Documentoscopia
Análise científica de documentos, tintas e soportes para estudar a súa autenticidade e recuperar información non visible.
A documentoscopia é o estudo científico dos documentos modernos, co fin de determinar a súa autenticidade ou falsidade, ou recuperar a súa lexibilidade.
Disciplina que estuda os documentos e os elementos que os constitúen: soportes de celulosa, algodón ou polímeros, tintas de impresión, selos, etc. Para iso, empréganse múltiples técnicas de análise que van desde a fotografía convencional de alta resolución e a macrofotografía ata as bandas non visibles para o ollo humano: reflectografía ultravioleta ou infravermella, e mesmo técnicas de fluorescencia, en particular a fluorescencia infravermella. De forma similar, a captura e análise multiespectral, xunto con técnicas de teledetección, son unha excelente estratexia para extraer información de documentos compostos por múltiples tintas ou con deterioracións importantes, como tintas esvaecidas por disolución ou envellecemento, ou eliminadas mediante procesos químicos. Mesmo, en ocasións, en documentos queimados.
As nosas técnicas en documentoscopia están fortemente inspiradas nas modernas técnicas empregadas na interpretación e no estudo de imaxes captadas por satélites ou avións, así como en técnicas herdadas do estudo de obras de arte con importantes graos de alteración ou modificacións realizadas ao longo do tempo.
Para nós, axustarnos a un método científico é unha parte fundamental do traballo. Por iso, todos os nosos traballos están apoiados nunha ampla literatura científica e empregamos ferramentas de elaboración propia, con cálculos e algoritmos baseados sempre en código aberto. Grazas a estes métodos, os nosos traballos son perfectamente reproducibles e poden ser sometidos a estudo por outros investigadores. Isto supón unha clara vantaxe nunha hipotética contradición no xuízo oral, no caso de que o problema estea xudicializado.
Se ten algunha dúbida ou problema legal, ou necesita algún tipo de informe técnico ou unha peritaxe, non dubide en contactar connosco.